Tončić Petešić va Opatije

Kako je bilo veselo va Gradskoj knjižnice Opatije ovaj utorak, 16.05.! Čuda judi je prišlo na 6 ur večer! Stiskali su se i rivali na vrateh da boje čuju i vide. Čuda deci je bilo, čuda kako kamečići na peske!

A zač su prišli? Prišli su videt Tončića petešića! Štoriju od Tončića petešića napisala je Vjekoslava Jurdana. Nju već siguro poznate, sako malo nan pride va gosti va Knjižnicu. Ž njun je bil i Radovan Kunić, mladi akademski kipar ki je odlučil v ruki zet pinelić pa j nacrtal Tončića. Va knjižnicu je prnesal i crteži i skici keh je delal doke je parićeval slikovnicu.

Oba su nan povedeli da pisat i crtat za decu ni lahko, ma oni su se korajno ćapali tega dela i bi reć da njin je dobro šlo aš slikovnica ima vaje tri izdavači z seh kraji naše županiji. To su Ustanova "Ivan Matetić Ronjgov", Naklada Kvarner i Katedra Čakavskega sabora Lovran.

Najveseleji del je bil lutkarska prestava ku su storila deca z osnovne školi Eugena Kumičića z Mošćeničke Dragi. Z tun su se prestavun natjecali na dečjen natjecanje Lidrano i arivali vaje do Županijskega natjecanja. Jako su se pježali i velen i mićen ki su jih čera gjedali z publiki. Z decun su bile i njihove meštrice: Suzi Galović ka jih je vodila i meštrica glazbenega Natalija Banov ka je storila muziku za prestavu. I deca i meštrice su se zabavjali so vreme parićevanja prestavi, a smeh na dečjemi obrazi govoril je da su kontenti i da se vesele nekoj novoj prestave!